Feb 28, 2008

مقولة أعجبتنى

ما أصعب الانتقال من البصر إلى العمى
وأصعب منه الضلالة بعد الهدى، والمعصية بعد التقى
كم من رجل قارب مركبه ساحل النجاة
فلما همّ أن يرتقي لعب به الموج فغرق
والخلق كلهم تحت هذا الخطر

Feb 24, 2008

معرض مكتبة الاسكندرية للكتاب

ذهبت اليوم لمعرض مكتبة الاسكندرية للكتاب بأرض كوتة
جميل المعرض.. مع انى شعرت إنه فاضى حبتين.. بس عادى فنحن فى مصر
اهتمام اصحابى بالكتب و القراءة ضئيل للغاية..
اهتمامى شخصيا بالكتب لحد ما كويس و احب ان أقرأ و اطلع.. بالرغم انى لم اتعود عليها اوى من الصغر.. لكن بدأت اتعود و مازلت اتعود
بس متحيرة.. يعجبنى الكثير من الكتب.. هل المفروض اشتريها كلها؟ ام اتعقل شوية و اقرأ تبعا لخطة .. يعنى كمجال مجال او مستوى مستوى
^_^
و كمان علشان اشترى كل ما يعجبنى اكييييييد الميزانية لا تسمح.. :)
يلا سأذهب تانى قريبا لانى لم امر على المعرض كله
المهم اشتريت كتاب اسمه
" الحضارة فى مهب الريح "
لمجموعة من الكتاب و المثقفين
اعجبنى فيه اسمه.. و انه ليس لكاتب واحد بل لعدة اى عدة وجهات نظر و كذا زاوية
و انه متنوع الاسلوب ففيه المقال و فيه القصيدة و فيه الزجل
ان شاء الله عند قراءته سأدون منه البعض..
طيب بذكر القراءة ......اقرأ الآن كتاب اسمه
" كيف نصنع المستقبل " لروجيه الجارودى
كاتب أجنبى بس واضح انه مسلم و الكتاب مترجم
الكتاب فلسفى شوية و يتكلم عن عيوب الحاضر و كيف نلافيها فى المستقبل
يتكلم شوية فى السياسة و شوية فى الاقتصاد و كثير فى الفلسفة
اقرأه للمعرفة العامة و متأكدة ان شاء الله انه ينفع و ملائم لدراستى لأن فيه من فكر ماركس القليل كما يبدو
الكتاب اصلا لم اتعمد احضاره بل وقع تحت يدى .. و كانت كل علاقتى به المفروض ايصاله من يد ليد.. لكن قلت اق{رأه قبل توصيله لصاحبته
و لى عودة للحديث شوية عن الكتاب
فى حفظ الله

Feb 23, 2008

عن القاهرة .. أتحدث

من القاهرة اتذكر و اتحدث
ذهبت لهناك عدة مرات.. و فى عدة مناسبات
احيانا فسحة و احيانا مهمة رسمية و احيانا عابرة طريق
اول ما يقع عليه بصرى.. محطة مصر .. محطة رمسيس.. شكلها.. مساحتها.. زحمتها.. صوت القطار و صوت المتحدث الداخلى يعلن عن القطارات و يستدعى الناس
و ادا خرجنا للشارع كان اكثر ما يلفت نظرى فى بلد المعز المآذن الجميلة.. المساجد هناك فعلا مميزة.. مآذنها عالية و مزخرفة.. حقيقى منظرها رائع
المبانى القديمة.. و المبانى الحكومية الفخمة و الكبيرة.. الهيئات و السفارات و المصالح
احساس انك فى العاصمة
^_^
و ماذا أيضاً يا قاهرة..؟
الكبارى الملتفة .. و الاعلانات الكبيرة العالية
و الارصفة المزدحمة جدا.. و الارصفة المسورة بسور حديد لا اعلم حتى الآن أهميته
أما عن وجوه الناس فالعجب العجاب.. الوجوه اغلبها شكلها غريب عن البلد.. و الكل يعلم ان القاهرة وقت العمل نصفها ليسوا من القاهرة
و الوجوه مشغولة البال و الفكر.. سريعة الحركة.. سريعة الغضب
و لن اتكلم فى زحمة القاهرة فدة حال مصر كلها..
احببت القاهرة لكن فقط لقضاء مصلحة.. لكن للعيش هناك فلااااااا و الف لااااااااا
كفاية الماء و العيش هناك طعمهم غريب
:(
و كمان لون التاكسى حيادى و كئيب..لم احبه
و كمان لم اشعر فيها بالامان .. ليلها مش كليلنا فى الاسكندرية على الاطلاق..
ليلها صعب.. و يأتى بدرى
كفاية كدة على القاهرة.. و اتعلمت منها كتير
:)

Feb 22, 2008

شىء واحد = النية

شىء واحد يضبط اشياء كثيرة



تعلمته أكثر ما تعلمته كان فى العمل التطوعى و صناع الحياة



هو .. النية



ان يكون كل عمل لله و فى الله


فعلا بتغير احساس الفرد بعمله .. حنتنقل من معاملة الناس لمعاملة رب الناس


و و بتقيد الانسان فى عمله ..
و النية لا تكون فقط فى عمل الخير كما يظن البعض لكن بيتكون فى كل الحياة
رايح الكلية ليه؟
بتساعد اخوك الصغير فى الواجب ليه؟
بتكلم تيتة كويس ليه؟
بتشتغل ليه؟
مش بتشرب سجاير ليه؟
مش بتكلم بنات ليه ؟
لازم لازم تكون الاجابة فى الآخر لله
رايح الكلية علشان اتعلم .. ليه ؟ علشان اخد شهادة.. ليه ؟ علشان اشتغل بيها .. ليه؟ علشان اجيب فلوس.. ليه ؟ علشان اعيش كويس
ليه؟ علشان اخدم الأمة ... ليه؟ علشان اعمر الأرض.. ليه ؟ علشان الله أمرنا بكدة..
ليه ؟ لان كدة سبب الخلق و سبب رضا الله و سبب دخول الجنة
كدة يبقى تمام اوى..
بس المهم تكون فاكر الغاية النائية و انت تعمل العمل الأول
دة شىء بسيط عن النية ..
و ربما يكون فى عودة

خبر سريع

خبر سريع ..
دمرت الولايات المتحدة قمر صناعى لها بسبب خروجه عن مداره
و روسيا و الصين تعلن احتجاجها
قلقاً من ان تكون أمريكا (تتمنظر) بتجربة سلاح جديد اعلانا لحرب فى الفضاء
^_^
بصرف النظر عن دوافع كل جهة و سب موقفها دة
اكثر ما أثار دهشتى ان الصين دخلت فى اللعبة و حرب الفضاء و الكلام الكبير دة
طيب و احنا مالنا ؟؟!!!
بالظبط هو دة سؤالى .......
و احنا بقى فين ؟ و احنا بقى مالنا ؟
الناس دى (أمريكا و روسيا و الصين) بتتكلم فى حاجات كبيرة
و العرب هنا .. لا سميع و لا مجيب
طيب لو أحسنا الظن
يبقى حنقول ان العرب و مصرنا الحبيبة تعمل فى الخفاء و ما حدش يعرف حاجة كنوع من السرية
^_^
و لو أسأنا الظن .. يبقى احنا نائمين و فى انتظار من يوقظنا
نفكر فى الدبابة و هم يفكرون فى حرب فى الفضاء
و عجبى
:)

Feb 19, 2008

الحدود

من قال ان الحدود قيود؟؟
هى فواصل.. و ليست قيود
فأنت حر حتى هذه الحدود
الحدود نهاية شىء
و ايضاً بداية لآخر..
ارى الحدود من الدين و التربية و العرف
و حدود الدين يجب ان تكون ثابته عند الكل ... لكن حدود التربية و العرف فاحيانا تختلف
كنت ارى اولا ان الحدود شىء تلقائى .. فهى موجودة
لكن لاحظت ان لااااااااااا .. احيانا لاختلافها مع الآخرين فيجب ان تُوضع
و ليس أفضل من ان يضع المرء لنفسه حدوده..

مهموم بايه؟

لكل منا همه .. و لكل منا همته
و الهم اول الأمر و الهمة نهايته
منا من أكبر همه صاحبة و موبايل
و منا من أكبر همها الموضه و الجمال
و منا من أكبر همه رزقه و عياله
و منا من أكبر همه عمله و سيارته
إذن كيف سنرقى و سترقى بلدنا و أمتنا إذا لم يكن بها أحد (مهتم ) و (مهموم) بحالها
؟؟؟
ليه فكرنا لا يرقى للحلم بأمتنا و حمل الحلم دة و العمل لأجله
طيب المنطق يقول
المخرجات = المدخلات + بعض الاضافات
لكن من الصعب ان يكون المدخل دقيق و يطلع لحم فى الآخر
طيب ننظر الى مدخلاتنا
!!!!!!!!!!!!!!!
طيب يبقى اكيد لن ننتظر ان يكون مخرجنا حلم لأمة او نهضة
يبقى من أين البدء؟ من المُدخل
ماذا فى العقل ؟؟
ماذا فى القلب ؟؟

Feb 16, 2008

امتحانات..يعنى حنغش نغش نغش

معلش خاطرة قديمة شوية ...

لكن اليوم الوقت متاح امامى لاتكلم فلاتكلم

الامتحانات ..ببساطة تساوى غش غش غش
و الله احيانا اترك الامتحان دقائق و اراقب فلان و هو بيركز على المراقب علشان مع اول التفاته يلقط كلمة من فلان


و لا صاحبنا علان اللى باع القضية و بيغش عينى عينك


و لا و لا ...
طيب جمهور الغشاشين يا إما واحد ما ذاكرش - او نشن و طلعت خطأ-


او يكون ذاكر و لم يتذكر



طيب فى منطقى الاتنين سواء


و الغش غش

طيب جملة قالتها صاحبتى.. بس انا مش بأغش بس أنا باغشش كمان يعنى اللى عايز حاجة باديهاله

يعنى مش غلط و لا حاجة

يعنى هى مش حتكسب وحدها و الكل سيكون مستفيد

يا سلااااااااااااام ...

و كأن الله حرّم الغش لأن المستفيد طرف واحد..فلما يكونوا اتنين يبقى تمام

!!!

الغش = ناس تأخد غير حقها

الغش = درجات بلا حق

الغش = تقدير -ان جاء- بلا حق

الغش = وظيفة بلا حق

الغش = مال من وظيفة بلا حق

و كل لحم نبت من الحرام فالنار أولى به.. النار أولى به.. أولى به

و من يعتاد الغش فى الصغيرة.. لا يؤتمن على الكبيرة

و الأمة لن تنهض بغشاشين

من يغش قبل أن يلتجأ لزميله او لزميلتها لا أظن انه التجأ إلى الله مالك الملوك المتصرف فى الأمر كله

و ربنا يهدى الجميع..


الكابتن حسن شحاته !!!!!

مش حاتكلم عنه شخصيا
لكن ما ذكرنى به ان سمعت له لقاء ع التلفزيون
و بعيد عن وجهه النظر النقدية .. تعالوا نقول كلام حلو فى حق الرجل ( المعلم ) زى ما بيقولوا
بجد و هو بيتكلم عن تكتيك الفريق .. تذكرت كل ما تعلمت فى التنمية البشرية عن
القيادة
التخطيط
التواصل
التحفيز
و كلام كتير اوى .. وجدته ينطبق امامى عملى
بصرف النظر حسن شحاته درسه ام لا .. عرف النظريات ام لا .. المهم انه طبق و طبق صح
و النتيجة نجاح و نصر
معانى كتير نتعلمها و ينقصنا جميعا التطبيق ..
و بس كدة ..
لا فى شىء كمان .. كنت أتمنى ان تكون دى فرصه كويسة اننا نلفت نظر الشباب اللى بيحب الكورة و بيحب اللاعيبة للقيم دى
يعنى لفت نظر بس...
يبقى استغلال للفرص
و سلامى للمنتخب..مثال الفريق الممتاز
كفريق عمل مش فريق كورة
^__^

Feb 15, 2008

اول اسبوع ف الترم

مر الأسبوع الاول من الدراسة - الترم الثانى

و كانت لى هذه الأفكار حول الكلية...
* حقا رجال محترمون *
دكاترة الكلية فعلا شكلهم وزير او سفير ^_^ علم و أدب و ثقافة و دين ..
بس يا خسارة الحلو لا يكمل - كما يقولوا- ما عندهم لسه لم يصل لنا - كطلبة غلبانين- بالشكل الكافى
هناك لسه حاجز... المنصة اللى قاعدين عليها يشرحوا من فوقها حاجز رهيب
و حقا عجبت جدا لما عرفت من كلام دكتور انه واضح انه دارس
presentation skills
كويس جدا و مع ذلك لا أجد فى التطبيق اختلاف
ربما الخوف من التطبيق ليؤدى لاهتزاز صورة الاستاذ .. لا اعلم السر
لكن ارجع و اقول حقاً رجال محترمون...أغلبهم يعنى
^_^
* جو الكلية *
هو من الآخراهتمامات مختلفة و (مستوى) مبادىء مختلف
فليس الصدق هو الصدق و ليس الحياء هو الحياء
أما عنى فى الكلية ..
فلا انكر ان كل ترم تهيج الافكار و احب المجال اكثر و يزيد الأمل بان اكون فيه ذات مكانه
فالله المستعان

Feb 14, 2008

دار الغرور

ألا كل ما هو آت قريب ... و للأرض من كل حىٌ نصيب
و للناس حبٌ لطول البقاء ... فيها و و للموت فيهم دبيب
و للدهر شدٌ على أهله ... فبين مشت و نبل مصيب
و كم من أناس رأيناهم ... تفانوا فلم يبق منهم غريب
و صاروا إلى حفرة تحتوى ... و يسلم فيها الحبيب الحبيب
أرى المرء تعجبه نفسه ... فأعجب و الأمر عندى عجيب
و ما هو إلا على نقصه ... فيوماً يشب و يوماً يشيب
ألا يعجب المرء من نفسه ... إذا ما نعاها إليه المشيب
إذا عبت أمراً فلا تأتيه ... و ذو اللب يجنب ما يستعيب
و دع ما يريبك لا تأتيه ... و جزه إلى كل ما لا يريبك
أغرك منها نهار يضىء ... و ليل يجن و شمس تغيب
فلا تحسب الدار دار الغرور ... ألم تدرى أنك فيها غريب
(أبو العتاهية)

Feb 13, 2008

راضية ..

خبر سريع ...
اليوم راضية عن أدائى فى جزء من بعض الأعما ل التى أقوم بها
الحمد لله .. بجد احساس الرضا دة احساس راااااااااائع
و الجميل ان يكون الرضا مرتبط بارضائك لله ..
الحمد لله ..
و سلام بقى علشان انزل الكلية .. و آه من الكلية
^_^

Feb 11, 2008

و كسبنا الكأس ^_^

مبرووووك لمصر.. كسبنا النهاردة كأس أفريقيا للمرة الثانية على التوالى
احساس رائع بالانجاز و التفوق
و الثقة بالنفس
الحمد لله كثيرا
طيب كل هذا جميل و رائع ..
بس لازم يكون لنا وقفات...
شبابنا لم يُرى يوما مجتمع على هدف او موقف زى الكورة .. بجد دة كتيييييييييييير
لا اعترض على ان نتفرج على المباراة و نشجع من القلب .. لكن العصبية و كأن ليس فى القلب و العقل غير الكورة
معقولة كل المصالح معطلة علشان مباراةو الشوارع خالية و المواصلات قليلة !!
و كأن كل مشاكلنا اتحلت و كل همومنا ازيحت
شىء يحزن ..
و الشوارع بعد المباراة و يااااااه على كم التصرفات الغير مسئولة
فرملة سيارات و نار و خبط و صوت عال و تعطيل للعربيات
و تعالوا للقطة اخرى فتياتنا الحلوين و هن متعصبات للتشجيع و متحمسات
غريب علىّ هذا المنظر و لم أحبه
نعم "هن" من حقهن حب الكورة لكن تقاليدنا فيييييين و قيمنا
آخر لقطة علشان اقوم انام ..
الفلوس اللى بتترمى على لاعبينا المحترمين (حقا محترمين) اين كانت من قبل و اهلنا فى فلسطين بيموتوا
كم رجل اعما ل تبرع بجائزة بالمليون دولار للاعبينا الكرام
ايوة نشجعهم لكن بالمعقول
و الناس التانية لها حق علينا و على فلوسنا
ايوة يا مصر نحبك ان تكسبى و لكن بعقل
ابناؤكم لسه مش راشدين فى تصرفاتهم
و عجبى ... دمتى يا مصر فى القمة

Feb 9, 2008

أولا .. من أنا

كيف أبدا .. و لم أعرف نفسى
أنا.. اسعى للأفضل فى الآخرة و الدنيا
لا اريد أن اصل للافضل وحدى .. فاحرص على ان يظل أناس حولى
ادرس مجال اختارته بنفسى
(القانون )
احب التعلم التجربة
ارى ان اتيحت لى فرص أكثر بكثير ممن مثلى و هذا من فضل ربى
صفاتى ... همممم حاولتك كثيرا أفهمها و لازلت اكون الصورة كاملة عن نفسى
لكن فلنقل ان اهم الصفات الكويسة .. انتماء عالى .. منظمة
منطقية الفكر...
احب الخصوصية و احترمها لدى الآخرين
يكفى هذا عن نفسى
يبقى سؤال لماذا أكتب هنا ..؟
للتجربة.. اولا
للتدوين .. ثانيا
للمشاركة .. ثالثا
و كمان يعنى لانى حابقى باذن ربى شخصية مشهورة و حاحتاج انشر افكارى الماضية فلازم يكون لها مصدر استرجعه منها
ههههههه
^_,_^

يااااه عدت ..

تماماً كما توقعت ..
بعد انشائها .. لن أكتب فيها
و لا يسألنى أحد أذن اين الافكار التى طالما اشتقت لتدوينها .. لا اعلم
ربما لما يكون الشىء غير متاح .. يكون فى رغبة للحصول عليه
و لما يتاح ... هممم خلاص بقى
^_^
طيب طيب..
ربما يكون هناك سبب آخر
ان حياتى إما مشغولة و مليئة بأحداث تستحق ان ادونها ... و هنا اكون فعلا مشغولة جدا عن حتى التفكير فى تدوينها
و اما اوقات فاضية لحد ما .. او فلنقل روتينية و هنا لا تستحق تدوينها .. باللرغم من انى فاضية لادون .. و لكن لا يوجد ما ادونه
جميل ... الحل يعنى
انى اكتب الخبر بايت *_* يعنى لما اكون فاضية قليلا اذكر احداث قديمة من وقت لم اكن فيه فاضية
و المهم فى الاخر العبرة .. و الحدث
تمام كدة ..
نبدأ تانى على بركة الله
آخر الأحداث
انتهت الامتحانات
أخدنا الاجازة
مرت احداث حلوة و مشغولة جدا طول ايام الاجازة
و آدينا راجعين بكرة الدراسة تانى
و ترم جديييييييييييييييييد
بس كدة .. و لى عودة